សារថ្លែងអំគុណចំពោះការអញ្ជើញចូលរួមកម្មវិធីបុណ្យចូលឆ្នាំថ្មី

Details

Published on Thursday, 26 April 2012 14:09

Hits: 23

ជំរាបសួរបងប្អូនមិត្តភក្តិនិស្សិតទាំងអស់គ្នា

ជាបឋមក្នុងនាមខ្ញុំជាប្រធានសមាគមនិស្សិតខ្មែរប្រចាំតំបន់កាន់តូ និងជំនួសមុខឱ្យសមាជិកសមាជិកា

ខ្ញុំសូមថ្លែងអំណរគុណយ៉ាងជ្រាវជ្រៅចំពោះការអញ្ជើញចូលរួម និងគាំទ្រក្នុងកម្មវិធីបុណ្យចូលឆ្នាំថ្មីប្រពៃណីយ៍ខ្មែរ

ដែលបានប្រារព្វទៅនាថ្ងៃទី២១កន្លងទៅនេះ។ ការអញ្ជើញចូលរួមរបស់អ្នកទាំងអស់គ្នាបានបញ្ជាក់ពីការសាមគ្គីយ៉ាងកក់ក្តៅបំផុតសម្រាប់ពួកយើងខ្ញុំដែលជាសមាជិកសមាជិកា រួមទាំងនិស្សិតខ្មែរទាំងអស់ដែលកំពុងរៀននៅក្នុងប្រទេសជប៉ុន។

ក្នុងនោះដែរ យើងខ្ញុំទទួលស្គាល់ថា ក្នុងកម្មវិធីនោះមានកំហុសឆ្គងជាច្រើនដែលបានកើតឡើង ដោយមិនបានព្រៀងទុក។

កំហុសទី១ គឺការពន្យាពេលវេលា។ ជាការពិត ពួកយើងខ្ញុំបានប្រឹងប្រែងអស់ពីលទ្ធភាពក្នុងការស្វែងរកទីតាំងដែលអំណោយផលដល់ពេលវេលា តែជាអកុសលគ្មានទីតាំងណាមួយដែលអនុញ្ញាតិឱ្យពួកយើងខ្ញុំបានរៀបចំតែងឆាកមុនម៉ោង៥កន្លះឡើយ ហេតុដូច្នេះហើយទើបពួកយើងពន្យាពេលដើម្បីតែងឆាក។

កំហុសទី២ គឺយើងបានចំណាយពេលខ្ជះខ្ជាយទៅលើអ្នកឧបត្ថមសមាគម។ យើងមិនចង់ឱ្យមានបញ្ហានេះកើតឡើងទាល់តែសោះ យើងបានដាក់កំណត់ដល់គ្រុមហ៊ុនទាំងអស់ត្រឹម៣នាទីប៉ុណ្ណោះ តែពួកគេមិនបានគោរពតាមការសន្យា។

កំហុសទី៣ ជាកំហុសខ្ញុំផ្ទាល់ ដែលខ្លួនខ្ញុំជាអ្នកបុរាណវិទ្យា គួរតែដឹងច្បាស់ពីការរៀបចំក្នុងពិធីចូលឆ្នាំឱ្យបានល្អជាងឆ្នាំមុនៗ។

កំហុសទី៤ ជាកំហុសដែលធ្ងន់ធ្ងរជាងគេ គឺការខ្វះខាតចំណីអាហារ។ ខ្ញុំទទួលស្គាស់ថាអាចជាកំហុសនៃការដឹកនាំរបស់ខ្ញុំ ដែលខ្ញុំមិនបានពិគ្រោះជាមួយសិស្សច្បងនានាមុននឹងសម្រេចចិត្តទិញម្ហូបអាហារដើម្បីធ្វើ។ តែម្ហូបដែលខ្ញុំបានត្រៀមនោះ ខ្ញុំបានពិភាគ្សាក្នុងក្រុមហើយទើបពួកយើងធ្វើ។ 

ជាការពិតចំនួនអ្នកចុះឈ្មោះតាមប្រព័ន្ធហ្វេសបុកមានត្រឹមតែ៧៦នាក់ប៉ុណ្ណោះ ហេតុដូច្នេះពួកយើងបានកំណត់ធ្វើម្ហូបសម្រាប់ចំនួន១៥០នាក់។ តែអ្វីដែលអ្នកទាំងអស់គ្នាបានឃើញគឺមានចំនួនដល់ទៅ៣០០នាក់ ដែលជាកត្តានាំឱ្យខ្វះចំណីអាហារ។ ហេតុដូច្នេះសូមមេត្តាកុំអាកអន់ស្រពន់ចិត្ត ប្រាក់របស់អ្នកទាំងអស់គ្នាដែលសល់ពីការទូរទាត់ នឹងក្លាយទៅជាប្រាក់វិភាគទានមួយយ៉ាងថ្លៃថ្លាដល់កម្មវិធីសប្បុរសធមដែលនឹងប្រព្រឹតទៅនាពេលខាងមុខទៀត។

អាស្រ័យដូចបានជំរាបខាងដើម ខ្ញុំបាទជំនួសមុខឱ្យសមាជិកសមាជិកាទាំងអស់ សូមសណ្តោសខន្តីពីសំណាក់បងប្អូន មិត្តភក្តិនិស្សិតទាំងអស់ នូវរាល់កំហុសខុសឆ្គងដែលបានកើតឡើងក្នុងកម្មវិធីចូលឆ្នាំថ្មី។ ជាចុងបញ្ចប់ ខ្ញុំបាទសូមលើកម្រាមដៃដប់ប្រណមបួងសួងដល់ទេវតាឆ្នាំថ្មី សូមជួយបីបាច់កូនខ្មែរទាំងក្នុងស្រុក និងក្រៅស្រុក សូមជួបតែព្រះពុទ្ធពរទាំង៤ប្រការ អាយុ វណ្ណ សុខ ពល កម្បីឃ្លាតឃ្លាឡើយ។